تجربتي مع العلاج الفموي للتخلص من حب الشباب | acne treatment

السلام عليكم ..

شخباركم !! 

اتوقع تدوينة اليوم هي اكثر تدوينة انطلبت مني ❤️

سويت هالتدوينة بكل ذمة وضمير وحاولت اجمع معلومات طبيه غير عن تجربتي اللي راح اضيفها طبعاً عشان تكون تدوينة مفيده ومتكامله وكل البنات يستفيدون منها .

حب الشباب من اكثر المشاكل الجلدية المنتشره بمجتمعنا وخصوصا عند البنات المراهقات ، ويختلف العلاج حسب طبيعة البشره وكمية الحبوب . طبعاً الدكتور يحدد نوع العلاج المناسب لحب الشباب 

 وعلاجها يكون بطريقتين :

- علاج موضعي للجلد : يكون عن طريق كريمات وتستخدم للحالات الغير شديدة ( حب الشباب الخفيف الى المتوسط )

- العلاج الفموي لحب الشباب : وهي عبارة عن ادوية تأخذ عن طريق الفم ، وغالباً تُصرف لعلاج حب الشباب الشديد .

بالنسبة لي انا جربت كل العلاجين وغالباً هذا المفروض اللي البنات يسونه يعني مانصح ان الشخص يبدأ على طول بالعلاج الفمي 

{ ملاحظة : هي عقاقير اسمها طبياً  isotretinoin (آيزوتريتينوين)  اغلب البنات يطلقون عليه اسم علاج الروكتان والروكتان مثال عليها وفيه انواع ثانيه مثل زيراكتان ، كوراكني وكلها تعطي نفس النتيجة }

الحين بتكلم عن هالحبوب من الناحية الطبية :

اولاً هي حبوب تؤخذ عن طريق الفم ، مشتقة من ڤيتامين ( أ ) 

وتعتبر علاج فعال وممتاز لحب الشباب .

بس ما تصرف الا بعد أذن من الطبيب وبعد عمل تحليل خاص ( وهذي نقطة مهمه يستهين فيها البعض وياخذون الحبوب من غير مايشاورون الدكتور ومن غير عمل تحليل ) .

يعمل العلاج على تخفيف الدهون الجلدية التي تفرزها الغدد الزهمية للجلد ، ويقلل من الرؤس السوداء والبيضاء والبكتيريا . 

العلاج على قد ماهو فعال ومفيد بس له اعراض جانبية وممكن ماتناسب الكل فعشان كذا لازم الدكتور يقرر .

ومو كل الاعراض الجانبيه تصير مع كل الناس يختلف من شخص لشخص طبعاً . 

وهو غير مسموح للحامل لأنه يسبب تشوهات للجنين .

بعض الاعراض الجانبية اللي تصير :

- جفاف الجلد ، وخصوصا حول الفم والشفتين .

- جفاف العيون .

- آلام في المفاصل والعضلات .

-  الصداع .

***

بتكلم عن بشرتي قبل كم سنه ، كانت تقريباً مختلطة عني حب شباب خفيف الى متوسط ورحت لدكتورة جلدية وصرفت لي محلول الديرما تي وكريم أكرتين ( تكلمت عنهم في تدوينة سابقه )

وفادة معي الحمدلله وراحت الحبوب وبعد فترة رجعت لي وحاولت اعالجها بالكريمات مانفعت معي ، وبعدها لاحظت ظهور رؤس سوداء ببشرتي وحبوب بسيطة واكثر شيء ضايقني هي الدهون اللي تفرزها بشرتي بشكل جداً يضايق .

بدون مبالغه حاولت اعالج المشكله بكل الطرق سواء كريمات ماسكات غسولات و و و .

بس ماقدرت اخفف من الدهون او اتحكم فيها ، خصوصاً الرؤس السوداء كانت مسسبه لي قلق فضيع .

بعد ماوصلت لهالمرحلة رحت للدكتوره وقالت مثل الكلام اللي كتبته فوق ان فيه نوعين من العلاجات علاج موضعي (كريمات) ، فموي (روكتان) وبحكم اني جربت كثير كريمات ومافاد معي فقررت اخذ الروكتان وما اخفيكم كنت متردده شوي بسبب الكلام اللي قريته عن الاعراض الجانبية للحبوب ، بس الدكتوره قالت بكتب لك جرعه بسيطه ولو صار اي شيء تواصلي معي .

الدواء يكون عباره عن جرعات معينه الدكتور يحدد لك يعني 20g , 30g , 40g ... 

انا بالبداية بديت بجرعه خفيفه كانت 20g وبعد فتره الدكتوره زادت الجرعه . لان الاستمرار على نفس الجرعه لمده طويله ممكن مايعطي نتيجة وماتستفيدين *طبعاً هالكلام صار معي وكل دكتور وطريقته وخبرته*

اخذت الحبوب لمدة طويله فوق الـ6 شهور . بالنسبة للمده على حسب استجابة بشرتك متى ماتحس الدكتوره ان بشرتك تحسنت واكتفت بتوقف لك العلاج .

استمريت اخذ العلاج وكل فتره نزيد الجرعه لين ماوصلت 50g وتعتبر قويه وتعبت منها شوي . وبعد ماخلصت استمريت على 20g لمدة شهر زياده يعني ماقطعته على طول لا بالتدريج .

أما بالنسبة للاعراض الجانبية اللي لاحظتها كانت : 

- الجفاف طبعاً : كنت اعالجه بشرب الماء بكمية لترين باليوم ، وارطب جسمي بشكل مستمر .

- آلام المفاصل : كنت استخدم حب الرشاد تحصلونه عند العطار ، استخدم ملعقة واحد مع كاس ماء وبعد ساعه اشرب الماء بس ، صح الطعم مو حلو بس احاول اشربه بسرعه عشان ماحس بالطعم ولاحظت ان مفاصلي مره خفت وماصارت تألمني ابد الحمدلله , بس لازم تستمرون عليه .

- آكتئاب : بصراحه احسه لعب بنفسيتي شوي . 

هالاعراض صارت معي مو شرط تصير مع كل الناس .

الحبوب كنت اخذها بعد وجبة الغداء عشان يزيد من امتصاصه من المعدة .

بالنسبة للنتيجه 

راح تلاحظونها بالتدريج ، بالبداية تزيد كمية الحبوب والرؤس السوداء بشكل سيئ ومزعج وبعد شهر او شهرين تبدا تخف شوي شوي لين تصير البشرة صافيه تجننن .

النتيجه صدق تستحق العناء والصبر خصوصا الدهون ببشرتي خفت بنسبة 90% تقريباً .

بعد ماخلصت العلاج صرفت لي الدكتوره كريمات من ضمنها كريم - ديفرين - استخدمه يوم وترك .

وشغله بذكر فيها ان وقت استخدام العلاج مايسمح بعمل عمليات جراحية ..الخ واي دواء يصرف لك تأكدي انه مايتصادم مع علاج الروكتان عشان ماتسبب لك مشكله .

سعر العلاج : الكرتون سعره يختلف حسب الجرعه بس فوق الـ100 ريال . 

اتمنى اني اعطيت الموضوع حقه ومانسيت شيء .

ولاتنسون تشاركوني تجاربكم وتفيدون البنات .