كريم الاساس من استي لودر | estee lauder double wear

بحكي اليوم عن اكثر كريمات الاساس - الفاونديشن - المشهوره 

وهو | estee lauder double wear |

طبعاً براند استي لودر من الشركات اللي اسعارها غاليه وتعتبر من الهاي اند 

الشركة ينسب اسمها لصاحبتها او مؤسستها - استي - وهي من مواليد 1908 ، نيويورك 

وتوفت عام 2004 *ماشاءالله عمرت بهالدنيا ههههه*

وبدت عملها في عام 1946 , اللي يحمس في الموضوع ان نفسها هذي استي هي اللي تملك شركة ماك وكلينك وشركات اخرى ، يعني تعتبر شركة استي لودر الشركة الام لهذيك الشركات الثانيه 

--

انا عندي الفاونديشن والكونسيلر منه ، ويكتب لكم تجربتي معهم

اول شيء الفاونديشن :

اي احد سمع قبل عن هالفاونديشن انا متاكده انه سمع انه فل كفرج يعني تغطيته عالية ، كانك حاطه قناع على وجهك هه بدون مبالغه 

القوام : 

مائي ، كريمي خفيف 

الحجم :

 علبة زحاجية سميكه بسعة 30ml

التغطية :

 مثل ماقلت فل كفرج | كاملة ، وممكن تكون متوسطة

الثبات : 

عالي جداً ويصل ل15

ويحتوي على نسبة حماية من الشمس بنسبة 10spf

النهاية:

مات | مطفي

رائي في المنتج :

هالفاونديشين اذا رحتي المحل بيخبرونك انه يناسب كل انواع البشره ، وخبيرات التجميل يقولون انه للبشره الدهنيه ، بس بعد تجربتي اكتشفت انه فعلاً مناسب للبشره الدهنيه او المختلطه الدهنيه لان تركيبته ثقيله وتقلب مات على باودر وممكن البشره الجافه يسسبب لها قشور .. وحتى ماراح تحتاجين باودر لتثبيته

وبما ان تغطيته ثقيله فهو يناسب البشرات اللي فيها عيوب اكثر كتصبغات وحبوب وبثور اما اذا كانت بشرتك صافيه فما تحتاجينه -عشان كذا ماحبيته كثير علي شخصياً-

ممكن يغنيك عن الكونسيلر بحكم التغطية العالية ، ولازم على اي وحده تبغى تشتريه تكون حريصه باختيار الدرجة لان انا اخذت درجة وصارت افتح مني وطلع فيه فرق بين لون جسمي ووجهي صح ماكان مرا مبين وحاوت اخففه بالبرونز بس كنت افضل لو كانت درجته اقرب لي ..

وانتبهوا تستخدمونه لغير المناسبات راح يطلع شكلكم سيئ جداً 

العيوب اللي لاحظتها فيه :

هو التعليب لان مافيه ضاغط لازم تصبينه زي اللبن * مدري وش جاب هالتشبيه فجأه * ، بس هالعيب انا اشوفه عيب كبير خصوصا انو ممكن تتحمسين وتضيعين كمية كبيره من المنتج من غير قصد وخصوصاً ان الكمية الزائدة ممكن تظهر وجهك بشكل متكتل بشع

وتقدرين تعالجين المشكله انك تشترين ضاغط يخليك تتحكمين في الكمية اللي تكفيك .

انا اوزعه يا بفرشه كابوكي او استبلنق ، وشخصياً افضل البيوتي بلندر او اي اسفنج بحيث اضضمن انها تمتص الباقي منه .

السعر : 230 ريال تقريباً

- صورة من مدونة اجنبية تبين النتيجة اللي يعطيها الفاونديشن -

--

ثاني شيء هو الكونسيلر :

طبعاً بما انهم من نفس المجموعه | double wear |

فاكيد بينهم اشياء مشتركه 

القوام :

 مائي كريمي

التغطية :

فل كفرج ، تغطية عالية

الثبات :

عالي ، ومايخطط ولا يتقشر ابدا ، يثبت في مكانه

رائي فيه :

هذا برضوا احس انه يناسب اكثر البشره الدهنيه او المختطله ووممكن للجافه اذا استخدمت قبله مرطب لانه يقلب لباودر ، ولازم يتوزع بسرعه ويندمج بشكل كويس والا راح يثبت بشكل غلط ,  مرا استخدمته وماوزعته بسرعه ونشف ويوم رجعت احاوب اوزعه تعبت معه ، فافضل يكون شغله سريع ، وبالنسبه لمنطقه حول العين انصح بترطيبها قبل عشان تتجنبين الخطوط او القشور .

السعر : ١٢٠ ريال تقريباً

ماركة استي لودر متوفره في :

هارڤي نيكلز ، دبنهامز ، وجوه