M.A.C fix+ review | فكس بلس من ماك

كنت محتاره وش انزل تدوينة ، بس بما جالسه اشوف الناس هابيين بالفكس بلس من ماك فقلت بكتب عنه .. صدق كذا فجأة صاروا كل البنات يبغون يشترونه لا واللي يجلط تشتريه بعدين تسال نستخدمه كيف ولايش ؟ طيب كيف تشترين شيء ماتعرفين لايش تستخدمينه طيب ممكن ماتحتاجينه ؟

طيب اول شيء بعلمكم 

ايش هو اصلا الفكس بلس ؟؟

هو عباره عن مياة معززه بالمعادن والغازات المفيده والمنعشه والمبرده للوجه 

*ومن مكوناته :

- الشاي الاخضر

- البابونج

- الخيار

- كما انه غير معطر ويناسب البشره الحساسة لا وريحته جميله جداً 

* طيب هل هو مثبت للميك اب ؟ 

- لا ، وكثير يستخدمونه على هالاساس واذا ماثبت الميك اب تبعهم يسبونه  

وبعضهم مالومهم لانهم سمعوا كلام بنات ثانيات وبعضهم يكونون بلوقر ويقولون انه مثبت ، اصلا بموقعهم ماكتبوا انه يثبت ابداً ولاجابوا موضوع التثبيت حتى 

* متى نستخدم الفكس بلس ؟

- نرش منه عالوجه قبل الميك اب وراح يكون زي الطبقه الخفيفه على سطح البشره ، تنعشها قبل الفاونديشن

- ممكن نرش منه على فرشة الفاونديشن او اسفنجة توزيع الفاونديشن ، وبهالطريقة راح نوزع الفاونديشن بشكل اسرع وسلس اكثر ويساعد انه يزيل اي تكتل

- بعد استخدامه على الاسفنجه او الفرشة اللي بنوزع فيها الكونسيلر ، وهذي الطريقة تساعد بانها تقلل الخطوط اللي تطلع مع الكونسيلر 

- بعد الانتهاء من الميك اب وخصوصاً بعد وضع الباودر ، راح يخفف لك منظر الباودر ويبين منظرة ناتشورال اكثر 

- اذا كنتي تستخدمين شدو او بيقمنت ( شدو منثور) ومو مبين اللون تقدرين ترشين على فرشة الشدو وتستخدمين بعدها الشدو وراح يفرق معك كثير * بس نصيحه استخدميه لاخر خطوه بالشدو لانو اذا استخدمتيه ماراح يمديك تدمجين الشدو بعد كذا *

- اذا عندك جل اي لاينر وصار ناشف يمديك ترشين علية ويرجع للحياة 

* باختصار له استخدامات كثيره وانصح كل وحده بايش يستخدم وتشوف هل هي تحتاجه او لا ؟ *

رأيي بالمنتج :

انا اشوفه منتتتج رائع ، وحبيته كثير وبيصير اساسي عندي .. لانو انا احب استخدمه بتوزيع الكونسيلر ولاني استخدم باودر كثير للتثبيت فيصير وجهي كنت مغبر فاستخدمه عشان يخف الغبار ويطلع طبيعي هههههه ، وغير كذا اذا سويت اي شدو وابغى احط بيقمنت ويكون واضح استخدمه مع الفرشة اخر خطوة ||~ برضوا استخدمه بعد الميك اب وقبل المسكارا ، اغمض عيوني وارش منه كم رشه من بعيد زي السبريه وما اتحرك ولا اتكلم ولا ارمش ليش مايجف عشان مايخطط * وتراه يجف بدقيقه بس *

التعليب :

علبته بلاستك عملية والضاغط تبعه يخليك تتحكمين فيه بالفتح او الاغلاق

- يجب تجنب وضعه عند الشمس او الاماكن الحاره -

مكان الشراء : 

- محلات ماك ب105 ريال

- من موقع ماك ب 22 $

- من اسواق طيبه * لانه دايم مخلص من محلات ماك*