تمارين | Focus T25

تدوينة اليوم راج تكون عن برنامج التمارين اللي جالسه اسويها هالفتره 

أنا ماحب مرا اروح الجيم لان احس مشوار واحب اسوي بالبيت عشان استمر

احس لو خلص اشتراكي مثلا بالنادي بوقف رياضه

اقصد مابغى اربط الرياضة بالنادي بس

لا ابي امارسها طول حياتي وبالبيت او اي مكان .

واحب فكرة دي في دي التمارين

لانهم مدربين متخصصين مرا وأحسن من حقين النوادي بعد

وحتى يعلمونك الطريقة الصحيحة للتمرين وتكون التمارين شاملة لكل عضلات الجسم

--

اسم البرنامج :

t25 focus 

اول شيئ بقولكم ليش اخترته ! 

المدرب تبع هالبرنامج هو نفسه مدرب برنامج -insanity -

واسم المدرب Shaun T  , طبعا هالبرنامج مرا مشهور وكثير ناس حصلوا نتائج تجنن عليه 

بس كان صعب والوقت طويل وماحب كذا

فيوم شفت البرنامج الثاني اللي بخبركم عنه اليوم وشفت انه نفس المدرب 

قررت اسويه

- اول شيئ مدة التمارين 25 دقيقه في اليوم يعني هو مناسب للي ماعندهم وقت

- فيه جدول امشي عليه وكل يوم تمرين غير يعني ما اطفش 

- نتائجه ممتازه وخصوصا للناس اللي ماتحب تروح النادي او ماعندها امكانيات

- مناسب لأصحاب اللياقة المتوسطة والمنخفضه بس أصحاب الهمة

**
لينك التحميل *تورنت* :

http://kickasstorrent.link/focus-t25-alpha-beta-gamma-x256-mp4-dvdrip-t7674068.html

الحين بشرح لكم طريقته :

البرنامج عباره عن ثلاث مراحل مدته 14 اسبوع

المفروض تسوين مرحلتين لان الثالثه بس للي يبون كمال الاجسام او بيدخلون بمسابقات فماهي مهمة

1- المرحلة الاولى هي : 

ALpha

وهالمرحلة زي الأساس لانها تهيأ جسمك للمرحلة اللي بعدها

مدتها : 5 أسابيع 

التمارين فيها عباره عن ( كاريود , شد للمنطقه السفليه , شد للبطن , تمارين لكامل الجسم ..)

هذا هو الجدول , ضروري تطبعونه انا طبعت لنفسي جدولين واحد للمرحلة الاولى والثاني للمرحلة الثاني

طبعا مثل اللي بالجدول كل يوم تمرين غير

التمارين بالاسبوع خمس ايام ويوم راحة (هاليوم مهم عشان ترتاح العضله)

اول اسبوع التمارين بتكون كلها 25 دقيقه فقط باليوم

ومن الاسبوع الثاني بيكون فيه يوم واحد بس تتمرنون فيه ساعه 

بتحسون هالمرحلة سريعه ومتعبه بس لانه بيحرق الدهون فيحتاج انك تبذلين مجهود

أنا خلصت هالليفل تقريبا الحمدلله وصدق لاحظت نتائج حلوه مرا بس ماكنت منتظمة مرا كويس بالاكل واخربط شوي

بس ان شاءالله على بداية رمضان بنظم اكلي وبأبدا بالمرحلة الثانيه وباذن الله احصل نتائج أفضل .

2- المرحلة الثانية : 

Beta

بهالرحلة نفس الشيئ 5 أسابيع

كل اسبوع نتمرن لمدة خمس ايام ويوم راحة لمدرة 25 دقيقة

بس يوم نتمرن لمدة ساعه بس

وبيركز اكثرعلى تمارين الشد وخصوصا البطن

وهذا الجدول تبعها .

**

بالنسبة لأيش تحتاجون للتمرين :

- مكان مناسب

- جهاز لاب توب او اي شيئ عشان تعرضون التمارين فيه

- فرشة تمارين

- جزمة رياضية

- اثقال للمرحلة الثانيه

**

تجربتي بصراحة لاحظت فرق وجسمي بدا ينشد , صحيح احتاج اكثر

بس النتيجة مرضية بالنسبة للوقت والمدة 

وخصوصا ان العضل يحتاج وقت على بال ماينشد خصوصا اذا كان الشخص عضلته نايمة ومترهلة من كثر الجلوس

والتسدح والتبطح ..

بعض الاوقات صدق وانا اسويها اصيح هههه لاتضحكون بس امل بس كل ماشوف الجدول واني خلصت يوم ويوم اتحمس

واذا ماصار لي خلق اتذكر انها بس 25 دقيقه وتخلص واقوم بسرعه .

ولاتنسون تنظمون اكلكم وتاكلون أكل صحي والا ماراح تحصلون نتيجة