تجربتي في علاج مشكلة السيلولايت (قشر البرتقال) | cellulite treatment at home

تدوينة اليوم ان شاءالله بتكلم فيها عن مشكله يعاني من شريحة كبيره جداً من النساء ومتعبه والكل يكرها لأنها تعطي شكل قبيح للجسم ومحرج .

واللي هي - السيلوليت - cellulitis .
( هو تغيير في الطبقة الطبوغرافية للجلد تحدث في معظم الإناث اللاتي بلغن سن البلوغ، يظهر كتغيير لتضاريس الجلد تتمثل في وجود ندب غائرة والتي تحدث أساسا للنساء في منطقة الحوض وكذلك الأطراف السفلية والبطن ويحدث بسبب فتق من الدهون تحت الجلد داخل النسيج الضام الليفي، مما يؤدي إلى مظهر قشر البرتقال )
والسيلوليت او السيلولايت يعطي شكل منقر ومترهل للجلد .. ( تحسين كان جلدك متعرفط ) .

غالبا يكون متواجد بالمنطقه السفليه للجسم

( الارداف ، الفخوذ ، اسفل البطن ..) 
 وماتقتصر على الاشخاص السمان فقط ، حتى النحاف يعانون منها .

-
السيلولايت يجي بدرجات متفاوته , تختلف من بنت لبنت :

1- يكون شديد جدا وبارز في كل الوضعيات (اثناء الوقف او الجلوس)

2- متوسط الشدة يبين فيه وضعيات معينه (مثلا وقت الجلوس فقط)

3- خفيف مايبان الا بالضغط عليه

فحسب نوع السيلولايت اللي عندك راح تعرفين قد ايش يحتاج الموضوع منك صبر واستمرار وعناية .. وحتى اللي يكون عندهم شديد يختلف من وحده لوحده فيه بنات اخف من بنات ..
-

ولها كثير اسباب :

- السمنة

- الوراثه : اذا امك او جدتك عندهم هالمشكله احتمال كبير تتوارثينها منهم .

- عدم ممارسة الرياضة وقلة الحركه

- تلخبط بعض الهرمونات بالجسم

- انخفاض بعض العناصر من الجسم مثل ( البوتاسيوم ، الزنك ، النحاس ..)

***

الحين بتكلم عن تجربتي شخصياً والحلول اللي ينصح فيها ..

انا هالمشكله عندي مع اني نحيفه مو سمينه بس مثل ماذكرت هي تكون عند الكل حتى بعض عارضات الازياء يعانون منها ..

اول شيء انا جلسة احاول اعالجها والحمدلله لقيت نتيجه وخفت مره كثير بس صدق الموضوع يحتاج صبر صبر واستمرار ..

-

1- ركزت على شرب الماء بكميات كبيره وصارت هذي عادة عندي اساسية .. بالبداية يكون الموضوع صعب تنسين + تروحين دورات المياه كثير بس بعد فتره تتعودين .. اشرب تقريبا لترين ماء يومين واكثر .
تقدرين بعد تحملين تطبيق عالجوال يذكرك دائما انك تشربين مويا عشان ماتنسين ..

فيه كثير تطبيقات نفس الفكره تقدرون تحملونها لجولاتكم سواء ايفون او أندرويد .

-

2- امارس الرياضه بشكل دائم ومستمر وانوع سواء تمارين هوائيه كارديو مثل المشي والنط .. او تمارين مقاومه مثل تمارين الفخوذ والمنطقه السفليه .

الرياضهه مهمه جدا جدا للصحه العامه + اعطاء مظهر جميل ومتناسق للجسم .

الزوائد وترهلات الفخوذ حتى لو كنتي نحيفه تعطي شكل بشع للجسم وهذي المشاكل حلها الوحيد الرياضه والتمارين ، ولا احد راح يفهم كلامي الا البنات اللي جربوا فعلا الرياضه والتمارين لوقت طويل وشافوا التغير ، انا الرياضه صارت عندي نمط حياة وماوصلت لهالمرحله الا بعد جهد وتعب لأن مو بسهوله تقدرين تتقبلين الرياضه كروتين دائم .

اعتذر تحمست شوي وانصرفت عن الحديث عن السيلوليت هههه .

بس فيه فكره بوضحها ان الرياضه والتمارين تفيد لكن مالها اثر مباشر لحل المشكله بس تعطيك نتيجه ان شاءالله مع الاستمرار

وتكلمت سابقا عن تمارن اسويها بالبيت مره حلوه وتفرق بالجسم :
1- تمارين جيليان :
2- تمارين شانتي :

-

-

3- استخدم مقشرات القهوه - مقشر فرانك - :

وصدق يعطي نتيجة معك خصوصا اذا وقت التفريك تركزين على المنطقه اللي فيها السيلوليت وماتفركين بقوه مره بشكل متوسط ودائري ولمدة عدة دقائق .. عشر دقائق او ربع ساعه . ولأن القهوه تحتوي على مضادات للأكسدة فهو مفيد جدا للتخفيف من هالمشكله.
ومو شرط ابدا تستخدمين مقشر فراند , تقدرين تسوين اي مقشر قهوه بالبيت وبأقل المواد وارخصها
وهذا فيديو لطريقة عمل مقشر القهوه , اذا ماناسبتك الادوات تقدرين تبحثين عن فيديو ثاني 
وتسوين اللي يناسبك :

https://www.youtube.com/watch?v=CXf5O0vfJhE

-

4- استخدمة أداة - للتخفيف من السيوليت - اخذتها من ذا بودي شوب .. 
بصراحه اخذتها كذا صدفه سألت عنها وقلت بجربها وصدق حلوه .. تتميز ان فيها زي الكور الصغيره ومتراصه بحيث انها تساعد على مساج هذي المنطقه .. ومع الوقت تخفف من هالمشكله وصدق هالاداة واللله ماتوقعت تفيد بس انصدمت انها تفرق مع الاستمرار .

هذي الاداة تعتبر زي اداة المساج للجلد تعمل على تقشر الجلد ويساعد على محاربه الدهون بهالمنطقه .. مثل ماتقول الشركه
واستفدت منها وانصح فيها .
وفيه ادوات مشابهه لقيتها بعدت اماكن تقدرون تستخدمونها عادي .

-

5- احرص بعد استخدام الاداة اللي فوق استخدم كريم للتخفيف من السيولايت اسمه :

lierac ultra body lift 10‬‏

 اخذته من الصيدلية الفرنسية اللي تكلمت عنها قبل في مدونة سابقه  - >
http://ghadeeralobaid.blogspot.com/2017/03/online-shopping-cocooncenter.html

والكريم من براند فرنسية مو متأكده اذا متوفره عندنا او لا لأني طالبته وسعره متوسط .

قوام الكريم خفيف جدا تمتصه البشرة بسرعه .. تقول الشركه عنه انه ينعم البشره ويخفف من مظهر قشر البرتقال ويشجع على القضاء على المياه الزائدة .. *هذي للأمانه مافهمتها*

من مكوناته الكافيين وعرق السوس .

الكريم للأمانه حسيته فرق معي + مع اني مانتظمت عليه للاسف يعني لو كنت منتظمه عليه راح تصير النتيجه ممتازه .

-

6- احاول قد ماقدر اني اكل اكل صحي (فواكه ، خضروات) واقل من المقالي والدهون والوجبات السريعه والحلويات على قد ما اقدر . لأن السيلولايت اصلا عباره عن دهون فأقلل منها عشان تخف .

^

كل الخطوات اللي ذكرتها فوق اسويها مع بعض ، يعني اعتبر علاج المشكله كورس كامل متكامل .

ولقيت نتيجه حلوه ومرضيه وفرقت المنطقه معي بشكل افضل .

اهم شيء تحرصين على الاهتمام وماتملين ويكون عندك صبر صبر صبر .

لان فعلا المشكله هذي صعبه ويبي لها طولت بال ، وحتى علاجات العيادات سعرها غالي ولافكرت اجربها لان ماحس نتيجتها مضمونه . ومتأكده ان علاجالعياده مايكفي لحاله اذا ماتمارسين رياضه وتحافظين على اكلك .

اخر شيء اتمنى استفدتوا من هالتدوينة ويارب مانسيت شيء بخصوص هالمشكله

وأتمنى انكم تشاركوني تجاربكم مع الموقع من خلال حساباتي في مواقع التواصل .. وملاحظاتكم لاتنسونها

_instagram : GHADEER_MAKEUPARTIST

SNAPCHAT : GHADEERBLOGGER