التسوق الألكتروني صيدلية بسعر التوفير | Online shopping cocooncenter

السلام عليكم ..

حماسكم في سناب تشات هو اللي خلاني استعجل بهالتدوينة ..

صورت قبل كم يوم منتجات عناية بالبشرة طالبتهم من موقع وبأسعار رخيصه جداً مُقابل الأسعار المُتوفرة عندنا 

في الصيدليات ..

أنا حبيت الموقع مره وأتوقع بقاطع الصيدليات من بعده لأن هو اللي خلاني انصدم من كمية التلاعب بالاسعار
 والاستغلال * ماتلاحظون كل متر ومتر بالشارع فيه صيدلية ؟* ..

أنا متأكده ان اغلب ربح الصيدليات قائم على المنتجات التجميلية اكثر من الأدوية .. طبعاً وفرق الاسعار ماهو ب بالضعف فقط لا ضعفها مرتين وثلاث واربع .. للأسف 

المهم ..

نجي للموقع وايش هو وطريقة التسجيل والطلب وتعبئة البيانات وعنوان الشحن وطريقة الدفع والاستلام وكل شي ... 

الموقع هو :

https://www.cocooncenter.co.uk/

وهو صيدلية - فرنسية - توفر اغلب الشركات الطبيه مثل : بايوديرما ، ايفين ، ڤيتشي ..الخ 

وكثير شركات طبيه ومعروفه .

والمنتجات تتنوع يعني فيه للبشرة وبعضها علاجي ..

وفيه للنساء والرجال والاطفال وحتى للرياضين 

اول ماتدخلين الموقع هذا الصفحه الرئيسية وعلى عاليمين في خانة لتسجيل الدخول .. 

نضغط على  - Register -

عشان نسجل حساب جديد ..

بعدها تفتح لنا هالصفحه نعبي بيانات التسجيل وعنوان الشحن مره وحده ، وبشرح لكم بطريقة سهله وبسيطه ..

وتعبين البيانات مثل ماوضحت بالصورة ..

ايميلك ورقمك السري انتي تختارين اي رقم تبين .

وبعدها تختارين انتي انسه او سيدة واسمك الكامل .

-

نجي للعنوان اتوقع فيه طريقتين لتحديد العنوان فيه يدوي تكتبين عنوانك عادي وفيه شيء ثاني يحدد عنوانك ، انا كتبته عادي فماراح اتكلم عن الطريقة الثانية 

تلاحظون حاطين لكم ثلاث خانات عشان العنوان ، اكتبوا العنوان بشكل مبسط مثلا :

•  اول خانة : الرياض او المدينة اللي ساكنه فيها .
• ثاني خانة : الحي اللي ساكنه فيه
• ثالث خانة : شارع بيتكم .

طيب كتبنا هالاشياء وكلها مو مهمه ، أهم شيء عشان توصلك الشحنه وتضمنينها هو رقم - الصندوق البريدي   الخاص فيك -

فيه عندنا رقمين للصندوق البريدي .. رقم عام للمدينه 

مثل رقم الصدوق البريدي للرياض هو - 11494 - 

وهذا عام لكل سكان منطقة الرياض .

ورقم ثاني خاص طبعاً يكون لبيتكم او ابوك او اخوك أسأليهم ويعطونك الرقم . 

طيب بعلمكم وين تكتبون هالرقمين 

عند خانة - postcode - 

اكتبي رقم الصندق البريدي للمنطقة اللي انتي فيها وهذا الرقم تطلعينه مو قوقل سهل ، وجنبه رقم صدوق البريدي الخاص فيك .

مثال :

11494 po box **** ( رقمك الخاص )

وجنبها اكتبي المدينة الرياض .

وتحت مهم انك تدخلين رقم جوالك بحيث تجيك رسالة اذا وصلت الشحنه .

ونضغط بعد كذا على - register - 

وكذا اكملنا عملية التسجيل .

**

• - بالنسبة للطلب  -

نبدأ نتسوق من الموقع عادي وختارين الاغراض اللي تبينها .

مثلاً انا حبيت هذا المرطب وبشتريه ، اضغط على العلامة الزرقاء تحت :

Add to bag -

واذا نزلتوا تحت تلقون وصف للمنتج وطريقة الإستخدام ، وتقيمات الناس لهالمنتج .. 

طيب بعد كذا فرضا انا خلصت واخترت كل المنتجات اللي ابيها راح اضغط فوق عاليمين علامة - السلة او     العربيه - 

اللي هي فيها المنتجات اللي اخترتها ..

راح تفتح صفحة فيها كل المنتجات اللي اخترتهم وأسعارهم 

وكم حبه طلبت .

وتحت السعر الكامل وخلاص بطلبهم الحين واضغط على 

( Checkout now  )

طيب بعد كذا بتفتح لنا صفحه تأكد لنا العنوان اللي كتبناه قبل ونختاره ونستمر .

بعد كذا بتفتح صفحه عشان نختار شركة الشحن اللي حابين نشحن فيها :

1. الشحن عن طريق البريد السعودي وهي ارخص شيء وتاخد مدة تقريبا اسبوع الى عشر ايام .
2. شركة شحن ماعرفها ولاجربتها .
3. عن طريق شركة شحن الـ DhL , وهي اغلاهم بصراحه وتوصل أسرع .

انا اخترت اول خيار عن طريق البريد السعودي .

وهنا بعد ماخترنا كل شي يقولك يالله ندفع ههههه ..

( proceed to payment )

تفتح لكم هالصفحه ونحط علامة صح على اول خيار 

( I use my loyalty... )

واختاروا بعدها طريقة الدفع سواء بطاقة فيزا او ماستركارد - او باي بال .

ونضغط على 

( access to payment )

 تفتح هالصفحه ونعبي البيانات مثل ماهي موجودة على بطاقتك  :

• اسمك الكامل مثل ماهو مكتوب عالبطاقه .
• ورقم البطاقه .
• وتاريخ انتهاءها .
• ورقم السري المتكون من ثلاث ارقم تلقونه بالجهه الثانية للبطاقه .

وخلاص نضغط validate .

وبكذا نكون تمينا عملية الشراء ، راح توصلنا رسالة بالبريد 

فيها رقم الطلب ورقم تتبع الشحنه ، تقدرين تشوفين وين شحنتك فيه ووين وصلت .

المفروض البريد السعودي يرسلون لك رساله او ماتوصل ويعلمونك بأي فرع هي متوفره . بس انا مدري ما ارسلوا لي وتاخرت ماستلمتها ومادريت انها وصلت 

الا بعد ماتواصلت مع البريد السعودي وقالوا انها واصله من كم يوم بفرع حي السلام .

فانتم انتبهوا لهالنقطة تابعوا الشحنه واول ماتشوفون انها وصلت وماجتكم رساله اتصلوا عليهم واستفسروا .

بالنسبة لتجربتي ..

 انا كانت ممتازه ولا فيه اي مشكلة واجهتني الا بخصوص الاستلام وكانت بسبب البريد السعودي انهم ماتواصلوا معي .

والمنتجات اللي طلبتهم كانت :

Avène Cleanance Soapless Cleanser 300ml

Eucerin Active Care for Lips 1 + 1 Free

Eucerin Sun Protection Oil Control Sun Gel-Cream SPF 50+ 50ml

Eucerin Dermatoclean Lotion Micellaire 3 en 1 2 x 400 ml

Bioderma Atoderm Hands & Nails Repairing Cream 3 x 50ml

Lierac Ultra Body Lift 10 Anti-Cellulite Draining Gel 400ml

Laino Fresh Deodorant Peach-Passion 50ml

الاسعار مثل ماذكرت اقل بكثير من الصيدليات ، وسعر الشحن يختلف حسب وزن الاغراض اللي طالبتهم . 

انا انصح انك تشترين كمية منتجات يعني مو منتج او منتجين ، وحتى مع سعر الشحن بتلاحظين انه ارخص  

من لو شريتيهم من الصيدليه .

الموقع مليان مليان منتجات كثيره مره لدرجة تعبت وانا اختار احترت فعلاً .

نصيحه جربي تشترين انتي وشخص ثاني وتقاسموا سعر الشحن إذا حسيتيه غالي عليك .

بالنسبة للاسعار اللي تنعرض بالموقع , فيه كم عمله من ضمنهم الباوند والدولار ..

تكلمت عن برنامج اسمه - currency converter -

وهو محول عملات مباشر تستخدمينه مع - google chrome -

ويحولك عملات اي مواقع بشكل مباشر للريال السعودي أو اي عملة تختارينها .

-

أخر شيء أتمنى انكم استفدتوا فعلا من التدوينة , تعبت عليها صدق مدري كم ساعه جالسه اكتب وأرتب ..

وأتمنى انكم تشاركوني تجاربكم مع الموقع من خلال حساباتي في مواقع التواصل .. وملاحظاتكم لاتنسونها

_instagram : GHADEER_MAKEUPARTIST

SNAPCHAT : GHADEERBLOGGER