زيادة كثافة الشعر | thick hair

تدوينة اليوم راح تكون عن تجربتي في زيادة كثافة الشعر ، وبحكم ان الكثير مرا طلبوها مني فحبيت انزلها هنا في المدونة بحيث يستفيد منها الجميع .

قبل ما ابدأ واذكر تجربتي بقولكم عن ملاحظة مهمه :

- الشعر الصحي اساسه يبدأ من داخل الجسم 

- الغذاء الصحي مهم بشكل ماتتخيلونه : البروتين (سمك،لحم،دجاج،بيض..الخ) ، الخضار خصوصاً الورقيات والفواكه .

- الصحه النفسيه مهمه ، القلق والتوتر والاكتئاب من احد اهم الاسباب اللي تؤدي لتساقط الشعر 

انا ذكرت هالملاحظات لانها مهمه اكثر من مليون خلطه يعني مهما تحطين خلطات ماراح تفيدك لو ماهتميتي بأكلك وصحتك .

شعري مشابه بشكل كبير للبنات الشرق آسيويات ، ناعم وخفيف

فكنت ابحث عن شيء يعطي كثافه وحيويه بشكل اكبر .

واكتشفت سر طبيعي يساعد انه يعطيك كثافه ، بس يحتاج استمرار وصبر وانتظام 

وهم عباره عن خلطتين سهلات مافيهم تعب اسويهم مرا بالاسبوع

يعني يوم اسستخدم الخلطه الاولى ويوم ثاني استخدم الخلطه الثانيه 

- خلطة زيت السمسم والثوم :

هذي اخذتها من قريبتي تقول انها تعرف وحده استخدمتها وشعرها صار كثير وكثيف والخلطه سهله فتحمست اجربها , بس للأمانه ممكن ماتناسب البعض لو فروة راسك حساسه .

بس تحتاجين :

- علبه زجاج نخزن فيها الزيت

- زيت سمسم

- ثوم 

نفرغ زيت السمسم بالعلبه وبعد كذا اجيب الثوم بدون تقطيع او ممكن تقطعينه نصه ونصه لا ماتفرق يعني ، بس انا اضيف معه القشر .

واخليها لمدة اربع ايام او اسبوع وبعد كذا ابدا استخدم الزيت واخليه بالعلبه كل مابغيت استخدمه اخذ شوي ، ومالاحظت انه يخرب او يتغير .

اوزعه واسوي مساج لفروة الراس ، اخلي الزيت على شعري لمدة ساعتين الى ثلاث ساعات .

بعد كذا اغسله بشامبو زين ولا يترك أثر ابدا ماشاءالله . 

- خلطة السدر :

هذي مشهوره وللأمانه من يوم انا صغيره وانا اسمع عليها مدح كبير واغلب الناس جربوها ولاحظوا فرق كبير .

تحتاجين :

- سدر مطحون تحصلونه عند العطار

- بصل

- ثوم

- ملعقة زيت خروع

- ملعقة زيت زيتون

اول شيء نجيب البصل والثوم من غير تقطيع ومع القشر ونغليه بمويا ساخنه لين يتحول لون المويا للون الاصفر تقريباً ونسكر النار.

بعد كذا نجيب السدر وناخذ الكمية المناسبه للشعر ( كل وحده تقدر قد ايش تحتاج ) ونضيف ملعقة من زيت الخروع وملعقة من زيت الزيتون ونعجنهم مع السدر وبعدها اضيف ماء البصل والثوم ونعجنه لين يصصير قوامه مناسب *شبيه بالحناء*

واوزعه على شعري واخليه لمدة ساعتين الى ثلاث وبعدها اغسله من غير شامبو مايحتاج الشامبو لان السدر ينشف الشعر وممكن مع الشامبو ينشف زياده ويعطيك نتيجه عكسيه .

كل الخلطتين اللي ذكرتهم مايتركون أثر لريحة البصل او الثوم ، ومثل ماقلت وبرجع اكرر اذا تبين كثافه يحتاج منك صبر وانتظام ومحافظة على اكلك .

انا شعري مصبوغ وصبغتي نازله وكل الخلطتين استخدمهم فقط على الجذور لان مابغى استخدمهم على شعري المصبوغ وماعرف ايش تصير معي تغيرات .

السدر جربته زمان وشعري مصبوغ ماتغير اللون بس ينشف فما حبيت ينشف شعري زياده واصلا هو ناشف اطرافه من الصبغه . يعني لو شعرك جاف استخدميه على الجذور فقط لأنه يجفف الشعر .