في الحقيقه هذي الكريمات غالباً ماهي فعالة جدا وما تناسب الا اصحاب الاوزان الصغيره مثلا وحدة تبغى تنحف عشره او سبعه الى خمسة كيلو ، وماتنفع ابدا وحدها لازم تدعمينها بالاكل الصحي والرياضه والبعض يحتاج مساج عالمنطقه اللي وضعتي عليها الكريم عشان يبين مفعولة . وهذا غير انها تحتاج وقت .
انا جربت نوعين من هالكريمات وراح اكتب لكم تجربتي معهم .
اولاً :
كريم هليابرين
من مكوناته الاساسية القهوة الخضراء *اول مرا اسمع فيها*
والماء ، والجلسرين ، وزيت البذور ، البن العربي ... الخ
وصفته لي الدكتوره وخبرتني انه فعال وفاد مع كثير ناس وهو يساعد ان الجسم انه يتخلص من الدهون .
انا كنت احتاج انزل خمسة كيلو بس ، وعملت دايت وصرت اسوي رياضه واستخدم الكريم مرتين يومياً .
الكريم يستخدم على اي منطقه بالجسم ( البطن ، الفخوذ ..الخ ) تحتاجين تخلصين الدهون منها ماعدا منطقة الصدر مايناسبها .
الكريم لازم تستمرين عليه ومرتين باليوم لمدة شهر مع الدايت والرياضه والا ماراح تشوفين نتيجة مرضية
يعني الكريم يعتبر مساعد فقط .
بالنسبة لتجربتي معه :
الكريم حقيقة فعال ويعطي نتيجة وطبي مافيه اي ضرر والبشرة تمتصه بسرعه ومايلزق مع الملابس او يكون طبقه ثقيلة على الجلد .
عيوب المنتج :
- سعره مرتفع ٢٠٠ ريال تقريبا
- حجم العلبه ماكفاني لشهر للاسف / 200ml
- ريحتة غريبه *بس اتحملها عشان النتيجة*
- لايتوفر في كل الصيدليات
مكان الشراء :
عيادات الاقصى - حي الروضه - الرياض
(ممكن تحصلونة بالصيدليات الكبيرة)
ثانياً :
كريم ازالة السولالايت وشد الجسم من نيڤيا .
حاولت اقراء مكوناته وافهمها بس اغلبها مركبات كيميائية ويحتوي على الكحول بنسب عالية وهذا شيء ماحبيته فيه
كثير ناس جربته وانا منهم
البعض اعجبهم والبعض لا .
يختلف هذا عن الاول لان هذا يشد الجسم ويزيل السولالايت مو زي الاول يزيل الدهون .
البعض يستخدمونه يبون ينحفون وهو ماينحف اصلاً .
يحتاج رياضه معه او مساج للمنطقه والاثنين مع بعض يعطي نتيجة افضل .
تجربتي مع المنتج :
المنتج لابأس فيه لكن نتيجته بسيطة ويحتاج صبر ، اذا تعانين من سولالايت خفيف راح يفيدك ، مايبين الا بعد شهر من الاستخدام المنتظم مرتين يومياً ، بارد عالجسم وتمتصه البشره بسرعه .
عيوب المنتج :
- ماينفع مع الكل
- غالباً نتيجتة غير مرضيه للاسف
- ريحتة اعتبرها سيئة
مكان الشراء :
السوبر ماركت ، صيدلية وايتس
السعر :
٤٥ ريال تقريباً
دعواتكم .
Post a Comment