العناية بالشعر المصبوغ | How to Take Care of Color Treated Hair

 بتكلم اليوم عن العناية بالشعر المصبوغ واللي تعتبر مهمة جداً ومضاعفه عن الشعر العادي .

كثير بنات بعد صبغة الشعر وخصوصاً السحب يشتكون من دمار الشعر وانه خرب وصار خشن وجاف ، وبالمقابل تحصلين البنت بس تغسل الشعر بشامبو ويمكن مره بالشهر بس تستخدم حمام الزيت ومع الاستشوار وحرارة الاجهزة والشمس ، شيء طبيعي ان الشعر يخرب .

بصراحة صبغة الشعر صار ضرورية عند كثير بنات ، واعترف ام اللي تصبغ مرا تدمن الصبغه لانها تغير كثير من اللوك وتعطي نيو لوك جذاب . بس نصيحة لاي بنت تبغى تصبغ تحاول انها تستخدم شركة موثوقه وبرضوا لو بتصبغ بمشغل تروح لاحد ثقه وتسال عن المنتجات اللي يستخدمونها وحتى لو تقول ابغى تخلطون الالوان قدامي هذا من حقها اهم شيء مايلعبون عليك . وبليز حاولوا تتجنبون السحب لان اصلا الصبغه تسبب تساقط الشعز وجفافه فما بالكم بالسحب ، السحب جدا يعدم الشعر ويسبب تساقط طبعاً ردود فعل الشعر تختلف من شعر بنت لبنت من حيث التغذية ونوعية الشعر بس نصيحتي تجنبوا السحب قد ماتقدرون ، وطبعاً الحين تطور الموضوع وصارت فيه بدائل حالياً فيه موضوع السحب بالكريم ويعتبر اخف من سحب الباودر وفي البعض يسوي تفتيح للشعر على عدة مراحل لين مايوصل لمرحلة مقاربة للسحب واقل ضرر .

قبل ماتكلم عن العناية بالشعر لازم اذكركم ان اساس الشعر من داخل الجسم
ومثل ماقلت الصبغه ممكن تسبب تساقط الشعر ، ومن اهم علاج لتساقط الشعر هو البروتين والفيتامينات والمعادن واللي كلها تتوفر بالاغذية الصحية ، برضوا المكملات الغذائية تساعد بس ابدا ماتغني عن الغذاء الصحي .

الفيتامين اللي بالصورة استخدمة حاليا , بس للحين ماقدرأحكم عليه لأن توني بادية استخدمة.

الحين بدخل لصلب الموضوع وهو عنايتي 

اولاً : الشامبو 

لازم يكون الشامبو مخصص للشعر المصبوغ ، عشان يحافظ على اللون ويرطب ويكون فيه المواد اللي يحتاجها شعرنا بعد تعرضة للصبغه . 

انا استخدم نوعين ،:

الاول هو لوريال ( الاحمر )

هالشركة جداً اثق فيها ، وهي مصممة مجموعة كاملة للشعر المصبوغ .

الشركة توصف الشامبو بانه يغذي الشعر من الجذور للأطراف ويمنح لمعان للشعر

ويساعد على المحافظ على لون الشعر لمدة 7 أسابيع تقريبا.

استخدم هالشامبو دائما كل ما تحممت تقريبا 

**

اما الشامبو الثاني وهو الشامبو ( البنفسجي من لاكمي )

هالشامبو مخصص للشعر الفاتح ، وبحكم ان شعري فاتح فاحتاج هالشامبو لان يخلص الشعر من الاندرتون الاورنج المزعج وكل الالوان اللي ممكن تطلع وتخرب اللون الاساسي ويحافظ على لون الشعر اكثر . والشامبو هذا يحتوي على الاحماض الامينية اللي تكون مفيدة لالياف الشعر ، وفيه نسبة ترطيب عاليه *هذا كلام الشركة بس ماحس ترطيبة عالي* وغير كذا هو خالي من الكحول والزيوت المعدنية .

انصح بالشامبو البنفسجي للشعر الرمادي والزيتي والفضي والاشقر ، طبعاً الشامبو البنفسجي فيه كثير شركات منتجه منه مثل لوريال وويلا وبعد فيه نوع قوي اسمه شيمر لايت اللي تكلمت عنه البلوقر نهى نبيل في قناتها باليوتيوب ، بس انا شخصياً استخدمت تبع لاكمي لانه متوفر هنا بدون الطلب وسعره رخيص .

نجي للحين للماسكات وحمام الزيت :

-الماسك من لوريال

 من نفس مجموعتهم للعناية بالشعر المصبوغ 

ميزة الماسك انه يحتوي على كمية كبيرة من السيروم اللي تمنح الشعر التغذية عميقة للشعر والمحافظة على اللون ويعطي ولمعة وترطيب .

الماسك هذا صدق من اول استخدام الاحظ فرق وترطيب ، استخدمه مرا بالاسبوع وطريقة استخدامي له تكون بعد ماغسل شعري بالمشامبو وشعري مبلل اخذ كمية من الماسك واوزع على شعري بالتساوي وطبعا ما اقرب للجذور والمنابت و انتظر تقريبا 3-5 دقايق واغسله كويس .

-حمام الزيت من لاكمي 

وهذا من نفس مجموعة الشامبو البنفسجي يعني مخصص مثل ماقلت للشعر الاشقر يساعد للمحافظة على لونه ، يحتوي على احماض امينيه للقمح الطبيعيه ، ومفيدة لالياف الشعر ، ويعطي ترطيب عالي للشعر وليونه ومرونه .

استخدمه تقريبا كل عشر ايام او مره كل اسبوعين ، وطريقة استخدامي له بعد غسل شعري بالشامبو البنفسجي اخذ كميه من حمام الزيت واوزعه على شعري بالتساوي وماقرب لم الجذور . بعد كذا اكون مجهزة منشفه مبللتها بمويا دافيه واغطي فيها شعري لمدة 5 دقائق . وبعدين اغسل شعري .

حمام الزيت والماسك كلهم حلوين ويعطون نتيجة ممتازه ومع الاستمرار تلاحظون فرق ، اعترف انكم تلقون نتيجة من اول استخدام بس تعتبر نتيجة وقتيه يعني يروح بس اذا استمريتوا كل اسبوع وعشر ايام بتلاحظون صدق ان الشعرض

 صار رطب اكثر .

- الشامبو البنفسجي والماسك تحصلونها بالرياض 

- أسواق الاندلس وشارع السويلم وبعض محلات تجهيز المشاغل -

زيت الارقان :

زيت الارقان اللي استخدمة اخذته على مدح كثير وأولهم رنيم صاحبة قناة ( اسأل مجرب ) ، الزيت من شركة كورية ، واول ما هبو الناس بزيت الارقان كان هو من ضمنهم .

وصف الموقع للزيت : مستخرج من شجرة الارقان اللي ما تمنو الا في صحراء المغرب , يساعد الزيت في إصلاح الشعر التالف وترطيب الشعر الجاف ويساعد على السيطره على الشعر المتجعد ويجعل الشعره أكثر ليونه ومرونة . كما أنه مفيد للجلد والأظافر بس شخصيا استخدمه للشعر بس , مدر ليه بس ان شاءالله اجرب بعدين .

الزيت يوفر حماية للشعر من الحرارة وتغذية للشعر , ويقال أنه يرطب أفضل بأربع مرات من زيت الزيتون .

أستخدمه بعد ما اتحمم أخذ منه كمية بسيطة جدا بقد حبة الفاصوليا وأوزعها على شعري خصوصا الاطراف , وممكن أستخدمه برضو قبل ما استخدم أي جهاز شعر للحماية من الحرارة. طبعا من ميزة هالزيت ان الشعر يمتصه ومايترك أي أثر دهني , والريحه جميلة جدا .

وهذي صورة من المواقع من بعد استخدام الزيت * اتوقع انها بعدد فترة من الأستخدام مو من أول مرا*

- زبدة الشيا

أكيد أغلبكم يسمع عن فوائد زبدة الشيا , وهي تحتوي على فيتامين A و E

وانا اقولكم اني ماقدر استغني عنها خصوصا لجسمي

أما للشعر فهي تعطي ترطيب عميق للشعر , وتساعد أنها تخفف وتعالج التقصفف والتكسر وحماية الشعر

 بس بصراحة استخدمها قليل لان مابغى تغير لون شعري

ممكن مره بالشهر او مرتين . اللي ماصبغت شعرها تقدر تستخدمها مرا كل اسبوع وبتلاحظ فرق .

استخدمها قبل ما اتحمم اخذ كمية واوزعها على شعري واتركها نص ساعه إلى ساعه . وأغسلها بعدين بالشامبو

كويس بحيث ماتترك أي اثر دهني .

**

أخر شيئ لو تلاحظون أنا ماستخدم بلسم بس لاني ماحبه وما احس احتاجة بس كثير مايستغنون عنه , بس بالنسبة لللبلسم وحمام الزيت والماسك وكل المنتجات اللي تنعم ماينصح انها تستخدم عالجذور لأن ممكن تسبب تساقط وهذا من كلام دكتورة جلدية.

لا إله الا الله وحده لا شريك له