افضل مرطبات الجسم بالنسبة لي | my favorite body cream

فيه كثير شركات تصدر مرطبات للجسم وكريمات ، وكثير يجي عليها مدح 

بس عن نفسي مقتنعه ان بيئتنا الصحراوية والحارة الجافه تخلي بشرتنا تحتاج ترطيب مضاعف وخاص .. وعلى قد ماجربت كريمات للجسم وطبيه وطبيعيه بس ماحسيت انهم اعطوني نتيجه مرضيه مثل الكريميات اللي بتكلم لكم عنها .

--

بس لو بتكلم عن بداية استخدام الترطيب للجسم كان تقريباً قبل 10,000 سنه مضت .

وكل منطقة تصنع مرطب خاص فيها على حسب المواد الطبيعيه المتوفره ، مثل امريكا اللاتينيه كانت تستخدم الافوكادو ، والبرازيل وافريقيا استخدموا زيت النخيل كمرهم الجلد . والاغريق اشتهروا باستخدام زيت الزيتون . ويقال ان كيلوباترا كانت تستخدم زيت الزيتون والسمسم بانتظام . 

بس مع التطور والتقدم في العلوم والثوره الصناعيه في نهاية القرن التاسع عشر ظهرت المرطبات والزيوت المعدنيه مثل الفازلين ، بس ما انتشرت بشكل كبير الا بعد ظهور التلفزيون في بداية اوساط القرن العشرين تقريباً . 

والحين نواجه كمية هائله من اعداد كريمات والمرطبات الجسم واختلاف الشركات والانواع والتصنيفات و و و ..الخ

بس ابغى اتكلم عن افضل المرطبات اللي استخدمتها لجسمي واللي ماقدر استغني عنها

حتى لو حاولت اروح وأرجع لها .

**

الفازلين - vaseline 

من اشهر المرطبات طبعاً ولا يستغنى عنه وموجود في كل بيت ، قوامه هلامي ثقيل وهو من مشتقات النفط لانه عباره عن زيوت معدنيه .

له فوائد كثير وعدت استخدامات .. بس لو بقول الصدق انا استخدمه فقط لاقدامي لان مالقيت مرطب للاقدام مثله . ادهن شوي منه على رجلي والبس شراب وتترطب مرا . 

بس فيه معلومة قريتها قريب من دكتوره ، كانت تقول ان الفازلين مرطب كويس بس ينقصه الماء فافضل طريقة لاستخامه يكون بعد تبليل المنطقه بشوي مويا سواء القدم او كامل الجسم 

وصدق استانست يوم قريت هالمعلومة لانها تسهل علي توزيعه بحكم انه ثقيل ومزعج شوي . 

ومانصح فيه ابدا للوجه لانه يسد مسام الوجه وثقيل على بشرة الوجه ، ولا افضل اني ازيل المكياج فيه الا اذا مالقيت غيره ، افضل الزيت زيتون لو اضطريت مثلاً .

الجليسوليد - glysolid cream

عاد هالمرطب للامانه كل ماقلت بغيره واجرب شيء ثاني ارجع له

احسسسن مرطب جسم بالكون كله ، المرطب اللي يتحدى كل الاطباء 

هو من انتاج شركة المانية ، ومن مكوناته الجلسرين .

والكريم صمم بداية للبشرات الحساسة ولاحظوا بعدين ان جميع الاشخاص صاروا يستفيدون منه وان البشرة مع الاستعمال تحسنت وقلة مشاكلها .

صدق يجنن ، يعني يرطب ويعطي زي الصفاوه للبشره ويخفف سمار البشرة ومع الاستمرار يروح السمار خصوصاً بمناطق المفاصل وكذا .

وحتى مافيه ريحه مزعجه بالعكس خفيفه .

بس عيبه انه ثقيل شوي واذا صرت عجازه ازوعه على جسمي وهو مبلل وبسرعه يتوزع .

بس انا غالباً اضيف له خرابيط وخرابيط لاني احسه الكريم الوحيد اللي مهما اضيف له مايضر وبالعكس يعطي نتيجه حلوه .

طبعاً كلها شغلات طبيعيه مثل مويا الورد وبعض انواع الزيت مثل زيت اللوز والجليسرين وزيت الزيتون .

وبعض الاحيان اضيف ليمون وممكن عسل وكل مرا اخربط ويعطي نتيجه حلوه ويصير قوامه اخف واسهل للاستخدام .

ودايم استخدمه على كامل جسمي بعد الشاور وجسمي مبلل يحافظ على الترطيب لوقت طويل .

وسألت عنه الدكتوره من فتره وقالت انه كويس ومامنه اي ضرر .

زبدة الشيا الخام - african shea butter

في البداية اشتهرت زبدة الشيا عند الافارقه لانها كانت تستخرج من شجرة الشيا وموطنها الاصلي هو أفريقيا , ويقال انها تتفوق على زبدة الكاكاو والزبد الاخرى . تحتوي على ڤيتامين A , E .

وللأمانه فيها كثير عناصر مفيده بس ماراح اتفلسف بالمكونات والعناصر لاني مافهم مرا بالكيمياء هههه .

زبدة الشيا مفيدة جداً جداً جداً من اليوم لبكرا بقول جداً

ومن اهم فوائدها :

- جفاف الجلد

- الطفح الجلدي

- الاكزيما

- جفاف فروة الرأس

- مرطب ومنعم للشعر

- مرطب لبعد الحلاقة

- تقليل العيوب والندبات

- الوقاية من علامات تمدد البشرة

فيه كثير شركات تنتج زبدة شيا بس هالنوع انا اللي جربته وكذا شكله نفس العلبة الصفراء وهي اللي اعطتني نتيجه ، وبالنسبة لاختلاف لون زبدة الشيا فهو شيء عادي لان فيه منها اصفر وابيض , ويقولون انو صعب انك تحددين اذا زبدة الشيا اصلية او لا من اللون .

انا اعرف انها اصليه من ريحتها لاني اعرفها ويكون فيها نقط سوداء وخصوصاً من تحت وهالنقط هي اللي بذور الشيا . والكثافه تختلف حسب الجو يعني بتحسون انها صلبة بوقت الشتا او اماكن التخزين الباردة ، وبوقت الصيف تكون .

وبالنسبة لتجربتي معها مرا كان حلوه ، ترطيبها عالي جداً 

وتخفف من التصبغات خصوصا الركب والاكواع اذا استخدميتها بانتظام وكثره تقريبا مرتين او ثلاث باليوم على المنطقه

والخطوط احسها تعطي نتيجه بس بطيئة يعني تحتاج وقت بس مع الاستمرار بتشوفون تحسن .

استخدمتها لجسمي وصرت ماقدر استغني عنها وبرضوا للشعر حلوه ترطب وتنعم . وماستخدمها على وجهي احسها ثقيله .

فيه وحده جربتها حول عينها وتقول اعطتها نتيجه حلوه بس مدري ماجربتها شخصياً . 

اما سلبياتها ممكن ريحتها مو مرا حلوه بس بحكم انها خام وطبيعيه تكون كذا ريحتها ، انا تعودت عليها .

والعيب الثاني هو اللي يكرهني فيها شوي انها تطبع المفرش يعني انا كنت استخدمها قبل النوم وبعد فترة لاحظت مفرشي تغير

واللي زاد الطين بله ان لون المفرش ابيض ، قتغير بشكل بسيط واضطريت اخفف منها او استخدمها وقت غير وقت النوم .

مكان الشراء : اون لاين ( امازون ) - انا اخذها من طيبه حرمة تبيعها اظن أم سالم اسمها واصليه .